У Польшчы махляры ўсё часцей крадуць нумарныя знакі з прыпаркаваных на вуліцах беларускіх аўтамабіляў. Пасля іх мацуюць на машыны, на якіх здзяйсняюць злачынствы (напрыклад, запраўляюцца на АЗС палівам і не плацяць за яго). Таксама могуць пакідаць аўтамабілі на платных паркоўках, і ўладальніку давядзецца плаціць. Выкупіць нумары зламыснікі прапануюць толькі ў асобных выпадках, піша mostmedia.io.
У паліцыі пацярпелым выдаюць даведкі і рэкамендуюць з імі звяртацца ў консульства РБ. Але там кажуць, што пытанне «не ў іх кампетэнцыі».
У эмігранцкіх чатах і групах нямала падобных гісторый.
Удзельнік абмеркавання пад нікам Misha патрапіў у непрыемную сітуацыю «пасярод дня». У маладога чалавека не толькі скралі нумары, але сапсавалі аўтамабіль.
«Парэзалі чатыры колы, падрапалі бок і скралі нумары», – напісаў беларус. Ён падазрае, што прычынай інцыдэнту магла стаць БЧБ-налепка на аўто.
Крысціна таксама апынулася ў такой сітуацыі. Яна звярнулася ў консульства, але праблему прыйшлося вырашаць самастойна.
«У консульстве проста адказалі, што гэта не ў іх кампетэнцыі. Прыйшлося ў Беларусь ехаць аўтобусам і там ужо атрымліваць новыя нумары», – напісала ў чаце беларуска.
Не дапамаглі ў консульстве і карыстальніцы пад нікам Ola.
«Нам адказалі, што нічым дапамагчы не могуць. Сказалі гнаць машыну з даведкай з паліцыі ў Беларусь па тым памежным пераходзе, па якім выязджалі, і рыхтавацца да допыту, як у нас так атрымалася», – падзялілася яна.
У некаторых выпадках ашуканцы дзейнічаюць больш выдасканалена. Ананімны ўдзельнік тэлеграм-чата «Беларусы Варшавы» сутыкнуўся з шантажом.
«Выкралі беларускія нумары ў Варшаве, вымагаюць грошы. Напісалі заяву ў паліцыю – сказалі ісці ў пасольства далей разбірацца», – падзяліўся беларус.
Беларусы ў Польшчы сутыкаюцца і з іншымі праблемамі. Так, нядаўна мы распавядалі пра беларуску Ірыну, якую гаспадыня ейнай здымнай кватэры ў Польшчы спрабуе гвалтоўна выселіць.
Ася Саковіч belsat.eu
