Дзяржстандарт выявіў мноства парушэнняў у адзенні брэнду «LC Waikiki». З 18 красавіка ўсе небяспечныя тавары забаронены для продажу ў Беларусі.
Паказнікі бяспекі былі парушаныя пры вырабе бодзі, камбінезонаў для нованароджаных, кашуляў, баек і штаноў для дашкольнікаў і школьнікаў. Таксама ў спіс небяспечнай прадукцыі трапілі школьныя партфелі брэнду.
Дзяржстандарт вызначыў, што ў адзенні для нованароджаных злучальныя швы з абмятаннем выкананыя на сподні бок. Па правілах, яны мусяць быць на адным баку, каб не раздражняць скуру немаўлятаў.
У адзенні для дашкольнікаў і школьнікаў не дапільнаваныя паказнікі гіграскапічнасці і паветрапранікальнасці – яны ніжэйшыя, чым мусяць быць. Гэта недапушчальна для дзіцячых трыкатажных вырабаў другога пласта, гаворыцца ў паведамленні Дзяржстандарту.
А яшчэ ў крамах «LC Waikiki» прадаваліся школьныя партфелі без святлоадбівальных элементаў на пярэдніх і бакавых паверхнях ды верхнім клапане.
Ася Саковіч belsat.eu